2021/03/29

Sestaoko egunean behin lehiaketako azken asteko irabazlea!

Beste denboraldi bat joan zaigu eta Sestaoko EGUNEAN BEHIN lehiaketako azken asteko irabazlea Asier izan da berriz ere! Zorionak!



 Zure saria jasotzeko jar zaitez gurekin kontaktuan, ez baitugu nor zaren jakiteko modurik: sestao_berba@aek.eus helbidera mezua edo 678 42 25 21 telefonora wasshapa bidaliz.


2021/03/26

"Ene baitan bizi da" liburua irakurtzeaz gain, Maddi Txoperena idazlearekin ere elkartuko dira Barakaldoko berbalagunak

 

Barakaldoko Irakurzale Klubeko kideak, Maddi Txoperenaren "Ene baitan bizi da" liburua irakurtzeaz gain, idazlearekin ere elkartuko dira, apirileko literatur jardunaldien barruan.

Zer: "Ene baitan bizi da" literatur solasaldia

Noiz: apirilaren 27an, asteartearekin

Zer ordutan: 19:00etan

Non: Clara Campoamor Kultur Etxean

Izena emateko: 678 626 567 edo barakaldo_berba@aek.eus 

Sinopsia: Aitari zerbait entzunik, amatxiren bizipenen gibeletik abiatzen da Marie, Donibane Lohizuneko gaztea, Parisko ikasketak bururatzeko egin behar duen azken memoria lanerako. Ez zaio erraza suertatuko, ordea, amatxik ez baitio nahi duena emanen, eta Mariek berak ere ez baitaki zeren bila dabilen, xuxen... Kutxa batean gotorturiko oroitzapen zatiak balira bezala jasoko ditu irakurleak Josefinaren gazte garaiko amets, pentsamendu eta bizi-minak, Marieren begiradapetik.

Askotariko istorioak gurutzatzen dira Maddi Ane Txoperena Iribarrenen lehen eleberrian: 1950.eko hamarkadan Ipar Euskal Herrian eta Frantzian neskato ibilitako emakumeen errealitateak, lehengo eta oraingo maitasun eta desamodio istorioak, laneko sufrimenduak, gatazka politiko baten ondorengo testuinguru baten ezinak, amatxi-biloba eta alaba-guraso harreman korapilatsuak... Guzia etorkizunaren eta orainaren arteko zubi jolas batean.


 


Portugaleteko apirileko Euskararen Agenda prest!

 


2021/03/23

Minotauro liburuaren kronika (Santurtziko Irakurzale Kluba) eta beste...

Martxoaren 17an elkartu zen Santurtziko Irakurzale Kluba Txomin Peillen idazlearen Minotauro liburua jorratzeko, azken urteotan landutako berezienetakoa, euren ustez; izan ere, honakoa diote bere inguruan:

Hilaren 17an elkartu ginen taldekideok, Txomin Peillenen “Minotauro” eleberriaren gainean hitz egiteko. Esperientzia berria izan da iparraldeko euskaran idatzitako liburua irakurtzea, are gehiago euskaltegiko ikasle bilakatu gara: hiztegiari behin eta berriro jo behar izan dugu.


Euskal Herrian, XVI. mendeko benetako intzestua du oinarri, nahiz eta Hego Amerikan eta orainaldian kokatu duen istorioa; izan ere, intzestu zein pedofilia bortxaketek ez dute muga geografikorik, ezta denborazkorik ere.

Izan ere, ez dabiltza geldi berbalagunak: otsailaren 23an Casa Torren Asier Arroitaren pandemiak zapuztutako Txiribueltaren inguruko xehetasun eta pasadizoen berri izan zuten, larunbatean Ondarroan izan ziren... Aste Santutik bueltan ekitaldi gehiago eta taldeak berriro martxan, zeu ere anima zaitezke!!!